Inflacioni në BE vijon ‘fluturimin’, rritja e çmimeve vështirëson jetën e qytetarëve

Jetesa për miliona evropianë po bëhet gjithnjë e më e vështirë. Vende si Gjermania, që vetëm pak muaj më parë mburrej me shifrat makro ekonomike, po shkojnë drejt recesionit të frikshëm në mënyrë të pakthyeshme.

Çdo gjë është e shtrenjtë, shumë produkte mungojnë dhe gjendja në llogaritë bankare nuk mjafton.

“Ndonjëherë kur bëj pazar ka mungesë produktesh, si për shembull vaji dhe më duket një marrëzi kur duhet të blej produkte të shtrenjta, pasi nuk kam shumë para”, thotë një qytetare.

Shqetësimet e njerëzve, por edhe zyrtarëve, konfirmohen nga Eurostat me të dhëna. Shtatorin e kaluar, inflacioni u përshpejtua në Evropë, duke arritur në 9.9% në nivel vjetor krahasuar me 9.1 që ishte në gusht.

Gjermania ishte pranë 11-përqindëshit, republikat baltike kaluan 20%, Franca 6.2, Malta 7.4 dhe në fund Finlanda me 8.4%. Sërish, energjia u konsiderua faktori kyç në rritjen e kuotës së inflacionit, e ndjekur nga ushqimi, alkooli dhe duhani.

Në këtë kontekst, me perspektivën për rritje të mëtejshme të normave të interesit për të luftuar inflacionin, euro ka humbur terren kundrejt dollarit. Gjithashtu, ndërhyrjet e BQE-së mund të intensifikojnë ngadalësimin e ekonomisë.

LEXONI GJITHASHTU:

• Poloni, norma e inflacionit bazë arrin në 10,7% në shtator
• Rritet inflacioni në Finlandë