Inflacioni në Eurozonë në nivelin më të lartë të të gjitha kohërave

Pushtimi rus i Ukrainës e ka futur Eurozonën në një realitet të ri ekonomik, ku inflacioni i lartë nuk është më një dhimbje e përkohshme koke, por rrezikon të zhbëjë rikuperimet e post-pandemisë.

Në mars, inflacioni arriti në 7.5 për qind në baza vjetore, niveli më i lartë i të gjitha kohërave për Eurozonën.

Shifra përbën një rritje domethënëse krahasuar me një vit më parë, kur inflacioni ishte 1.3%, shumë më poshtë se objektivi prej 2% i caktuar nga Banka Qendrore Evropiane.

Të dhënat për marsin janë të parat e EUROSTAT që marrin parasysh pasojat e luftës në Ukrainë, që tani ka hyrë në muajin e dytë dhe kur fundi i saj është ende larg.

Inflacioni vjetor, që është kuota e ndryshimit të çmimeve të mallrave dhe shërbimeve, ka qenë në rritje që nga fundi i verës së kaluar, kur një mospërputhje mes ofertës dhe kërkesës i çoi çmimet e gazit në stratosferë.

Trendi vijoi përgjatë dimrit kur temperaturat e ulëta nxitën rritjen e konsumit të elektricitetit dhe u përkeqësua pasi presidenti Vladimir Putin dha urdhrin për pushtimin e Ukrainës.

LEXONI GJITHASHTU:

• Inflacioni në Greqi në nivele rekord prej rritjes së çmimeve
• Rritet kostoja e jetesës në Shqipëri, inflacioni mbi normë