Irani dhe fuqitë botërore pro rikthimit të SHBA në marrëveshjen bërthamore

Irani dhe fuqitë e mëdha pjesëmarrëse në marrëveshjen që e ndalon Teheranin të zhvillojë armë bërthamore deklaruan të premten se janë gati të mirëpresin rikthimin e Shteteve të Bashkuara.

Përfaqësuesit e Kinës, Francës, Gjermanisë, Rusisë, Mbretërisë së Bashkuar, Iranit  si dhe Bashkimit Europian, thanë se “njohin perspektivën e një rikthimi të plotë të Shteteve të Bashkuara dhe theksuan gatishmërinë e tyre për këtë zhvillim.

Nënshkruesit e marrëveshjes konfirmuan se do të rinisin bisedimet javën e ardhshme në Vjenë mbi marrëveshjen e 2015 “në mënyre që të identifikojnë qartësisht heqjen e sanksioneve dhe masat e që duhen zbatuar për armatimin bërthamor”.

Uashingtoni u tërhoq nga marrëveshja bërthamore në vitin 2018 me vendim të presidentit Donald Trump, por pasardhësi i tij Joe Biden ka sinjalizuar se SHBA është e gatshme të rikthehet.

Irani ka shkelur vazhdimisht kufizimet e marrëveshjes mbi sasinë e pasurimit me uranium. Lëvizjet e Teheranit kanë qenë të përllogaritura për të ushtruar presion ndaj kombeve të tjera në marrëveshje – Rusia, Kina, Franca, Gjermania dhe Britania – që ato të bënin më shumë për të hequr sanksionet e forta të vendosura nga ish-presidenti Trump.

Irani ka deklaruar se përpara se SHBA t’i rikthehet marrëveshjes ajo duhet t’i rikthehet dhe detyrimeve ndaj marrëveshjes duke hequr sanksionet.

Lexoni gjithashtu 

• Dialogu për çështjen bërthamore, i dërguari i OKB-së vizitë në Teheran për të shpëtuar marrëveshjen
• Marrëveshja bërthamore, SHBA e gatshme të rinisë bisedimet me Iranin, Teherani: Hiqni sanksionet
• Tensionet Iran-SHBA, Teherani prezanton dy raketa të reja me rreze të gjatë