Irani kërcënon me mbylljen e Hormuzit dhe sulme ndaj rajonit

IRGC ka paralajmëruar për pasoja të rënda në rast se Shtetet e Bashkuara ndërmarrin sulme ndaj centraleve bërthamore të Iran, pas deklaratave të mëhershme kërcënuese nga Donald Trump.

Në një deklaratë zyrtare, Garda Revolucionare Islamike tha se nëse objektet bërthamore iraniane shënjestrohen, Ngushtica e Hormuzit do të mbyllet “plotësisht” dhe nuk do të rihapet deri në rindërtimin e tyre.

IRGC paralajmëroi gjithashtu se infrastruktura energjetike, teknologjia e informacionit dhe komunikimit, si dhe termocentralet në Izrael do të jenë objektiva të sulmeve të gjera. Sipas deklaratës, edhe kompani të ngjashme në rajon me aksionarë amerikanë do të “shkatërrohen plotësisht”.

Më tej, u theksua se termocentralet në vendet e rajonit që strehojnë baza amerikane do të konsiderohen objektiva legjitime, duke rritur ndjeshëm tensionet dhe rrezikun për një përshkallëzim të gjerë në Lindjen e Mesme.