Italia gati të prodhojë vetë vaksinën kundër Covid-19

Italia do të investojë në një kompani lokale të bio-teknologjisë për të zhvilluar një vaksinë kundër COVID-19. Lajmin e bënë të ditur zyrtarë vendas pasi qeveria i cilësoi rezultatet e fazës së parë të testimit inkurajuese.

Kompania “ReiThera” po e zhvillon vaksinën në bashkëpunim me atë gjermane “Leukocare” dhe atë belge “Univercells” dhe ka nisur bisedimet me Bashkimin Evropian për furnizimin e bllokut me doza në muajin shtator.

Një projekt fillestar përfshiu 45 vullnetarë të moshave nga 18 në 55 vjeç, asnjë prej të cilëve nuk tregoi efekte anësore në 28 ditët e para pas vaksinimit, deklaruan studiuesit e institutit “Lazzaro Spallanzani” në Romë, ku u kryen testet.

Rreth 92.5% e vullnetarëve kishin nivele të zbulueshme të antitrupave neutralizues, deklaruan studiuesit, të cilët shtuan se projekti i testeve është planifikuar të përfundojë në verë.

Vaksina e kompanisë “ReiThera” bazohet në të njëjtën teknologji të përdorur nga “AstraZeneca” dhe “Johnson & Johnson”.

Grupi deklaroi se synon të prodhojë rreth 100 milionë doza në vit, që mund të ruhen në temperaturat nga 2 në 8 gradë Celsius.