Italia po reziston. Ja përse në vendin fqinj nuk është verifikuar ende vala e dytë

Teksa rastet me COVID-19 shtohen, Italia duket se ka mësuar nga eksperienca. Pas kulmit të verifikuar në mars, muaj që shënoi depërtimin e virusit në Evropë, vendi ndoqi në mënyrë strikte masat për frenimin e epidemisë dhe hyri në një bllokadë të gjatë.

OBSH vlerësoi efikasitetin e menaxhimit të emergjencës së koronavirusit, kurba e të cilit ra në muajin qershor. Që nga fillimi i epidemisë së COVID-19 në Itali, të paktën 308 mijë persona janë prekur, 35 mijë e 800 prej të cilëve kanë vdekur, ndërsa të shëruarit janë rreth 220 mijë. Aktualisht, mesatarja ditore e vdekjeve është 20 persona, ndaj nuk mund të flitet ende për një valë të dytë.

“Pranimi në masë i masave kufizuese. Kjo, sipas ekspertëve pranë Kolegjit Mbretëror të Londrës, është një nga arsyet përse një valë e dytë infektimesh nuk është regjistruar ende në Itali, ndryshe nga vendet e tjera evropiane. Për këtë arsye, autoritetet insistojnë se një skenar i tillë për momentin mund të përjashtohet, edhe pse nuk dihet ende se sa do të rëndojë rihapja e shkollave”, raporton nga Roma gazetarja e Euronews, Giorgia Orlandi.