Italianët kërkojnë ndihmë, protestojnë në qendër të Romës pas rihapjes së vendit

Dhjetëra qytetarë italianë u grumbulluan gjatë ditës së sotme për të kërkuar ndihmë financiare nga qeveria, pas rihapjes së vendit.

Me flamuj kombëtarë në duar, maska trengjyrëshe protestuesit u mblodhën në ‘Piazza del Popolo’ për t’i kërkuar ndihmë kryeministrit Giuseppe Conte.

Roma ka parashikuar që ekonomia do të kontraktohet me të paktën 8% këtë vit si rezultat i pandemisë COVID-19, por javën e kaluar qeveria italiane miratoi një paketë ndihme prej 55 miliardë eurosh (59.6 miliardë dollarë), e cila synon të ndihmojë bizneset e dëmtuara dhe familjet në vështirësi.

Paketa stimuluese pason një paketë fillestare prej 25 miliardë eurosh, e prezantuar në mars dhe përfshin një përzierje grantesh dhe zbritje taksash për të ndihmuar firmat të shpëtojnë nga humbjet ekonomike. Ajo gjithashtu ofron ndihmë për familjet, përfshirë subvencione për kujdesin e fëmijëve dhe stimuj për të forcuar sektorin e turizmit të shkatërruar.

Në Milano, qytetarët ndryshe nga romanët, zgjodhën të shijojnë diellin dhe ajrin e pastër në liqenin artificial të qytetit. Numri i përgjithshëm i vdekjeve  nga COVID-19 ka arritur në 32.735, por statisticienët besojnë se Italia, si shumë vende të tjera, ka pësuar numër më të madh viktimash se çfarë sugjerojnë të dhënat zyrtare.