Jetesa e shtrenjtë në Tiranë, mbi 50 mijë lekë për të përballuar muajin, 30% shkojnë për ushqime

Inflacioni për gushtin u fiksua në 2.4%, ku diferencën, edhe gjatë këtij muaji e bënë produktet e shportës ushqimore.

Por në treg çmimet janë shtrenjtuar edhe në grup-mallra të tjera, përfshi edhe qiratë e argëtimin. Të dhënat e INSTAT për inflacionin shërbejnë si orientim, jo vetëm në perceptim, por edhe në vlera reale, se jetesa në Shqipëri po bëhet gjithnjë e më e vështirë. Agjencia “Numbeo”, e cila merr në analizë kostot e jetesës në botë, krahason se të jetosh në Tiranë kushton më shtrenjtë se në Prishtinë, Shkup apo Sarajevë.

Sipas kësaj agjencie, kostoja e jetesës së një banori të kryeqytetit në muajin gusht arriti në 51,300 lekë, rreth 3500 lekë më pak se paga mesatare (56 710 lekë). Ndërkaq, një familje me 4 anëtarë duhet të sigurojë në portofol jo më pak se 181 mijë lekë

Për banorët e kryeqytetit, pjesa më e madhe e parave në portofol harxhohet në market, më tej për qira e transport, ndërsa koha e lirë dhe veshjet zënë volumin më të ulët. Përveç çmimeve të shtrenjta të ushqimeve, shqiptarët kanë të ardhura ndër më të ulëtat në rajon, dhe kjo bën që ata të kenë peshën më të lartë të shpenzimeve për ushqime.

Në Europë, Zvicra e Norvegjia janë vendet me koston me të lartë të jetesës, ndërsa sipas qyteteve Tirana renditet në vendin e 410, nga 566 rajone të marrë në shqyrtim.

LEXONI GJITHASHTU:

• Rindërtimi pas tërmetit, rriten çmimet e materialeve të ndërtimit, në rrezik cilësia e punimeve
• Për çfarë dallohen qarqet kryesore të vendit? INSTAT publikon raportin