Jo më shërbime në ambiente publike, Greqia ‘ndëshkon’ të pavaksinuarit

Të gjithë personat e pavaksinuar në Greqi do të duhen të pajisen me një test negativ ndaj COVID-19 në mënyrë që të marrin shërbime në banka, zyrat publike, parukeri apo të tjera ambiente publike.

Vendimi hyn në fuqi në 6 nëntor dhe është i vlefshëm edhe për punonjësit në sektorin privat dhe publike.

Bizneset që thyejnë rregullin do të gjobiten me 5 mijë euro dhe rrezikojnë të mbyllen për 10 ditë.

Masa të tilla u morën pasi dita-ditës është vënë re një rritje e të infektuarve me COVID-19; 6700 të prekur në 24 orët e fundit. 60.5% e popullsisë në Greqi është vaksinuar plotësisht.

Holanda po ashtu ka rikthyer disa masa kufizuese. Nga e shtuna qytetarët detyrohen sërish të mbajnë maska në hapësirat publike dhe në rrugë. Nisur nga kjo fundjavë, krahas bareve dhe restoranteve, pasaportat COVID bëhen të detyrueshme për të hyrë në muze, palestra, kopshte zoologjike. Kryeministri në detyrë, Rutte bëri thirrje për qetësi pasi në vend ka pasur debate të shumta lidhur me kufizimet.

Situata epidemiologjike vijon të jetë e rënduar në Bullgari ku bëhet thirrje kombëtare për vaksinim. Në 24 orët e fundit është raportuar për 310 viktima, 90% e të cilëve nuk janë të vaksinuar. Bullgaria është vendi me nivelet më të ulëta të vaksinimit në BE.