Kim Jong-Un kërkon falje, i dërgon letër presidentit Moon për vrasjen e zyrtarit koreano-jugor

Udhëheqësi i Koresë së Veriut Kim Jong-un ka kërkuar falje për vrasjen e një zyrtari koreano-jugor.

Lajmi është bërë i ditur nga Seuli, që raporton se në adresë të presidentit Moon Jae-in kishte mbërritur një letër nga Peniani, ku konfirmohej vrasja e shtetasit jugor, i cili ishte shpallur i humbur më herët gjatë javës.

Në letër, si rrallë herë, Kim Jong-un kërkonte ndjesë për vrasjen, ndërsa e cilësonte ngjarjen ‘të pahijshme’ dhe që nuk duhej të kishte ndodhur. Ai madje shprehte keqardhje për zhgënjimin e shkaktuar te opinioni publik koreano-jugor.

Vrasja është e para e një qytetari koreano-jugor nga forcat koreano-veriore brenda një dekade.

Shtetasi 47-vjeçar ishte gjetur nga ushtarët koreano-veriorë ndërsa lundronte në ujërat e Veriut. Ai ishte qëlluar për vdekje pasi nuk kishte pranuar të zbulonte identitetin e tij dhe ishte përpjekur të arratisej.

Kufiri mes dy Koreve patrullohet nga forca të shumta ushtarake, pasi ka dyshime se trupat veriore ndjekin politikën e vrasjes së personave të dyshimtë për të parandaluar hyrjen e koronavirus në vend.