Kim Jong-un lavdëron trupat e Koresë së Veriut në luftë, thekson aleancën e pathyeshme me Rusinë

Udhëheqësi i Koresë së Veriut, Kim Jong-un, lavdëroi në mesazhin e tij të Vitit të Ri trupat që po luftojnë në një “tokë të huaj”, raportuan të enjten mediat shtetërore, duke nënvizuar aleancën “e pathyeshme” të Phenianit me Moskën.

Pa përmendur drejtpërdrejt luftimet përkrah Rusisë kundër Ukrainës, Kim iu drejtua personelit që Agjencia Qendrore Koreane e Lajmeve (KCNA) e përshkroi si “njësi operacionesh jashtë vendit”, duke i përgëzuar për mbrojtjen e tyre “heroike” të nderit të kombit dhe duke i udhëzuar të “jenë të guximshëm”.

“Teksa i gjithë vendi është i mbështjellë nga atmosfera festive e pritjes së Vitit të Ri, ju më mungoni edhe më shumë ju, që po luftoni me guxim në fushëbetejat e tokës së huaj edhe në këtë çast, besnikë ndaj urdhrit të atdheut tuaj,” tha ai, sipas KCNA-së.

“Pas jush janë Pheniani dhe Moska,” shtoi Kim në mesazh.

Koreja e Veriut ka dërguar mijëra trupa për të mbështetur pushtimin e plotë në shkallë të gjerë të Ukrainës nga Rusia, i cili po hyn në vitin e tij të katërt, sipas agjencive të inteligjencës së Koresë së Jugut dhe atyre perëndimore.

Të paktën 600 prej tyre kanë humbur jetën dhe mijëra të tjerë kanë pësuar plagosje, sipas vlerësimeve të Koresë së Jugut.

Analistët thonë se në këmbim, Koreja e Veriut po merr ndihmë financiare, teknologji ushtarake si dhe furnizime me ushqim dhe energji nga Rusia.

Sipas shërbimit të inteligjencës së Koresë së Jugut, ushtarët koreano-veriorë udhëzohen të vrasin veten në vend që të bien rob.

Udhëheqësi i Koresë së Veriut i lavdëroi ushtarët për forcimin e aleancës me Rusinë, duke u bërë thirrje të luftojnë “për popullin vëllazëror rus”.

Dy robër lufte nga Koreja e Veriut, të mbajtur nga Ukraina, thanë se shpresonin të nisnin një “jetë të re” në Korenë e Jugut, sipas një letre të parë nga AFP në dhjetor.

Raportet e mëparshme kishin treguar se dy burrat, të mbajtur rob nga Kievi që nga janari 2025 pasi ishin plagosur në fushëbetejë, po kërkonin të dezertonin drejt Jugut.

Në letër, dy të burgosurit falënderuan ata që po punonin në favor të tyre “që na inkurajuan dhe e panë këtë situatë jo si një tragjedi, por si fillimin e një jete të re”.

“Ne besojmë fort se nuk jemi kurrë vetëm dhe i shohim njerëzit në Korenë e Jugut si prindërit dhe vëllezërit tanë, dhe kemi vendosur të hyjmë në përqafimin e tyre,” shkruan ata.

Pas javësh spekulimesh, Koreja e Veriut konfirmoi në prill se kishte dërguar trupa për të mbështetur forcat ruse në shtypjen e një inkursioni të papritur ukrainas në rajonin e Kurskut.

Kim i dërgoi trupat në Rusi në bazë të traktatit të mbrojtjes së ndërsjellë që të dy vendet nënshkruan në vitin 2024, tha në një deklaratë Komisioni Qendror Ushtarak i Partisë së Punëtorëve në pushtet.

Ndërsa në qershor, Kim riafirmoi sërish “mbështetjen e tij të pakushtëzuar” për luftën e Rusisë kundër Ukrainës gjatë një takimi me një zyrtar të lartë rus.

Komentet u bënë gjatë bisedimeve me sekretarin e Këshillit të Sigurisë së Rusisë, Sergei Shoigu, në Phenian, sipas KCNA-së.

Kim përsëriti “mbështetjen e tij të pakushtëzuar për qëndrimin e Rusisë dhe politikat e saj të jashtme në të gjitha çështjet kyçe të politikës ndërkombëtare, përfshirë çështjen ukrainase”, raportoi KCNA.