Kina rifillon fluturimet direkte drejt Koresë së Veriut pas 6 vitesh

Kompania ajrore kineze rifilloi fluturimet direkte midis Pekinit dhe kryeqytetit të Koresë së Veriut, Phenianit, të hënën, jo shumë kohë pas rikthimit të shërbimeve të trenave të pasagjerëve midis kryeqyteteve.

Fluturimi i Air China u prit nga ambasadori kinez në Korenë e Veriut, Wang Yajun, dhe diplomatë të tjerë, sipas mediave shtetërore kineze.

Shërbimi i trenave të pasagjerëve nga Kina në Korenë e Veriut kishte rifilluar më 12 mars.

Fluturimet dhe trenat e pasagjerëve për në Korenë e Veriut ishin pezulluar që nga fillimi i pandemisë COVID-19 në vitin 2020.

Kompania ajrore e Koresë së Veriut, Air Koryo, rifilloi fluturimet midis kryeqyteteve në vitin 2023.

Koreja e Veriut ndaloi të gjithë turistët e huaj gjatë pandemisë, por ka filluar të lehtësojë kufizimet, me një grup turistësh rus që hyri në vend në vitin 2024.

Grupet turistike kineze kishin përbërë 90% të të gjithë vizitorëve në Korenë e Veriut para ndalimit, dhe vonesa në rifillimin e tureve kineze i habiti vëzhguesit.

Kina është partneri më i madh tregtar dhe aleati kryesor i Phenianit, por Pekini ka shprehur pakënaqësi gjatë viteve ndaj testeve të raketave nga Koreja e Veriut që mund të përdoren për të synuar Korenë e Jugut dhe Shtetet e Bashkuara.

Udhëheqësi i Koresë së Veriut Kim Jong Un udhëtoi për në Pekin në shtator për të marrë pjesë në një paradë masive ushtarake , duke shënuar herën e parë që një udhëheqës i Koresë së Veriut kishte qenë i pranishëm në një paradë ushtarake kineze në dekada.