Kompania fituese e tenderit 5-vjeçar për menaxhimin dhe operimin e Terminalit të Kontejnerëve në portin e Durrësit, ‘Hili Company Limited’ iu përgjigj kërkesës për koment të Euronews Albania pas akuzave të ngritura nga PD një ditë më parë.
Kompania mohoi akuzat e ngritura nga PD si kompani e përfshirë në skandalin e Panama Papers.
“Mohojmë kategorikisht që ndonjë nga kompanitë tona ose pronarët përfitues të jenë të lidhur me “Panama Papers”,” thuhet në përgjigjen e mbërritur në redaksinë tonë.
Lidhur me akuzën e ish-deputetes demokrate Jorida Tabaku se kompania fituese ‘Hili Company Limited’ është si një kompani offshore të akuzuar për pastrim parash dhe se administratori i kësaj kompanie është hetuar në Maltë për pastrim parash, kompania e mohoi gjithashtu.
“Të gjitha kompanitë tona janë të regjistruara me pronarë përfitues të njohur dhe asnjë prej tyre nuk përmendet në to. Ne jemi të përfshirë në dy terminale madhore në Europë përmes kompanive filial të Hili Company,” tha kompania.
Kryeministri Rama ishte gjithashtu në qendër të akuzave të PD, se është përfshirë në “aferë korruptive 30 milionë euro në terminalin e Portit të Durrësit”.
Euronews Albania iu drejtua me kërkesë për koment ndaj akuzave të PD, zyrës së shtypit të kryeministrit Edi Rama por nuk ka marrë ende një përgjigje. Një kërkesë për koment iu dërgua gjithashtu Autoritetit Portual Durrës.
Sipas të dhënave të disponueshme në faqen online të Agjencisë së Prokurimit Publik, në garë për tenderin me vlerë 3.1 miliardë lekë kanë qenë dy kompani, Hili Company Limited dhe HHLA International Gmbh (e cila nuk ka paraqitur ofertë në fazën e dytë).
Autoriteti kontraktues e ka justifikuar shpalljen fituese të kompanisë Hili me arsyetimin e ofertës më të favorshme ekonomike.
Lexoni gjithashtu:
