Konflikti, armenët denoncojnë sulmet e dyfishta nga azerët dhe turqit

Organe mediatike armene publikuan të premten pamje që tregonin pasojat e bombardimeve në Stepankert, kryeqyteti i rajonit Nagorno-Karabak.

Zëdhënësja e Ministrisë së Jashtme armene deklaroi se vendi po përballet me një agresion të dyfishtë që vjen si nga Azerbajxhani, ashtu edhe nga Turqia.

“Aksionet e përbashkëta agresive të Azerbajxhanit dhe Turqisë dhe përdorimi i terroristëve të huaj kanë minuar sigurinë dhe paqen rajonale, duke rritur ndjeshëm rrezikun për një lufte të vërtetë. Ky agresion ndaj rajonit Nagorno-Karabak duhet të marrë fund”, deklaroi zëdhënësja Anna Naghdalyan.

Zëdhënësja ka shtuar se Armenia mbetet e angazhuar për një zgjidhje paqësore të konfliktit dhe e gatshme për t’u përfshirë në përpjekjet e Grupit të Minskut të OSBE-së për të rivendosur paqen në rajon.

Por nga ana tjetër, pala azere ka deklaruar se, nëse Armenia dëshiron që të marrë fund përshkallëzimi i situatës, atëherë ajo duhet t’i japë fund pushtimit të saj.

Konflikti mes Azerbajxhanit dhe forcave etnike armene vazhdoi për ditën e gjashtë rresht, në atë që konsiderohet si përplasja më e rëndë që prej viteve ’90, me secilën palë që pretendon se i ka shkaktuar dëme tjetrës.