Konflikti Armeni-Azerbajxhan, disa dhjetëra të vrarë

Luftimet mes Armenisë dhe Azerbajxhanit u përshkallëzuan ndjeshëm ditën e hënë, kryesisht brenda dhe përreth territorit malor Nagorno-Karabakh dhe të paktën disa dhjetëra persona kanë mbetur të vrarë.

Forcat e armatosura të dy ish-fqinjëve të Bashkimit Sovjetik sulmuan njëra-tjetrën me raketa dhe artiljeri, në atë që konsiderohet si shpërthimi më i ashpër i një konflikti që zgjat prej disa dekadash. 

Çdo lëvizje që mund të përshkallëzojë situatën mund të tërheqë në lojë fuqitë rajonale si Rusia dhe Turqia. Moska ka një aleancë ushtarake me Armeninë, ndërsa Ankaraja mbështet minoritetin etnik turk në Azerbajxhan.

Duke reaguar, presidenti turk Recep Tayyip Erdogan deklaroi se Armenia duhet të tërhiqet menjëherë nga tokat azere që ka pushtuar, në mënyrë që t’i japë fund krizës.

“Rajoni do të shohë sërish paqe vetëm pasi Armenia të tërhiqet menjëherë nga tokat azere që ka pushtuar. Çdo propozim tjetër i imponuar jo vetëm do të jetë i padrejtë dhe ilegjitim, por do të përbëjë një përkëdhelje për Armeninë”, tha Erdogan.

Armenia me shumicë të krishterë dhe Azerbajxhani kryesisht mysliman u përleshën për herë të parë në fillim të viteve ’80 për kontrollin e rajonit Nagorno-Karabakh, një territor i ndodhur brenda kufijve të Azerbajxhanit por i populluar kryesisht nga minoriteti etnik armen.

Luftimet kanë ringjallur shqetësimet mbi stabilitetin e Kaukazit jugor, një korridor për tubacionet që çojnë naftën dhe gazin në tregjet botërore.