Forcat austriake të sigurisë kanë kryer një seri kontrollesh ndaj personave të dyshuar si ekstremistë islamikë, ditën e përvjetorit të sulmeve të 11 shtatorit.

Bastisjet u zhvilluan në mbarë vendin pasi aktet terroriste të vitit 2001 përbëjnë një simbolikë frymëzuese për ekstremistët.

Në kuadër të operacioneve u kryen kontrolle edhe në burgje dhe u sekuestruan pajisje digjitale si telefona, për të kërkuar prova për propagandën ekstremiste.

“U morën masa ndaj 72 personave, shumica e të cilëve, 52, ndodhen në burg. Këto masa janë të rëndësishme dhe të vazhdueshme pasi ne, gjyqësori dhe institucionet e tjera hetimore kemi konstatuar në disa raste se disa persona së fundmi janë radikalizuar në ambientet e burgut”, deklaroi Gerhard Karner, ministër i Brendshëm i Austrisë.

Bastisjet erdhën një muaj pasi autoritetet shmangën një komplot për të sulmuar fansat në koncertin e Taylor Swift në Vjenë, event që u anulua.

Zyrtarët austriakë deklaruan se i dyshuari kryesor, një 19-vjeçar, frymëzohej nga ideologjia e Shtetit Islamik dhe synonte të vriste mijëra njerëz.

Ai kishte postuar në internet një betim për besnikëri ndaj liderit aktual të grupit terrorist. Gjithashtu, autoritetet thanë se kishin gjetur materiale mbi ISIS dhe Al Kaedën në banesën e një të dyshuari të dytë, vetëm 17 vjeç.

LEXONI GJITHASHTU:

• Dy gra rrëfejnë për BBC: Andrew Tate na përdhunoi, na vendosi duart në fyt dhe…
• Inteligjenca gjermane: Një njësi ruse kreu sulme kiberbetike ndaj NATO dhe BE