Koreja e Veriut shkel rregullat, teston raketën e fuqishme

Koreja e Veriut lëshoi të dielën raketën më të fuqishme që ka testuar që kur presidenti Joe Biden mori detyrën, ku shkeli kufizimet për armatimet me rreze.

Ushtria japoneze dhe ajo koreano-jugore deklaruan se raketa ishte qëlluar në një trajektore vertikale për të shmangur ndërhyrjen në hapësirat ajrore të vendeve fqinje.

Ajo arriti një lartësi prej 2 mijë kilometrash dhe udhëtoi 800 kilometra të tjerë përpara se të binte në det.

“Aktivitete të caktuara të Koresë së Veriut, përfshirë testimin e vazhdueshëm të raketave balistike, përbëjnë kërcënim për vendin tonë, rajonin dhe komunitetin ndërkombëtar. Testimi i këtyre raketave shkel rregullat e Këshillit të Sigurimit dhe OKB-së dhe ne i dënojmë fuqishëm”, tha Hirokazu Matsuno, sekretar i kabinetit qeverisës në Japoni.

Testimi vjen pak pasi lideri koreano-verior Kim Jong Un kryesoi një mbledhje të partisë më 20 janar, ku anëtarët e vjetër të saj kërcënuan me heqjen e moratoriumit, përballë atyre që i cilësuan si akte armiqësore nga Shtetet e Bashkuara.

Në prill të 2018-s, Kim shpalli një pezullim të testeve bërthamore dhe të raketave balistike ndërkontinentale, teksa u përpoq të ndiqte rrugën e diplomacisë me presidentin e atëhershëm amerikan Donald Trump, me qëllim lehtësimin e sanksioneve ekonomike.

LEXONI GJITHASHTU:

• Gazetarja kërkon ndihmën e talebanëve pasi i mohohet kthimi në Zelandën e Re