Kreu i NATO: Oferta e Trump për garanci sigurie është përparim në bisedimet e paqes

Sekretari i Përgjithshëm i NATO-s, Mark Rutte, tha se oferta e Presidentit të SHBA-së, Donald Trump, për garanci sigurie për Ukrainën përbën një “përparim” në sigurimin e një marrëveshjeje të mundshme paqeje për Ukrainën.

“Fakti që keni thënë ‘Jam i gatshëm të marr pjesë në garancitë e sigurisë’ është një hap i madh, është vërtet një përparim dhe bën gjithë ndryshimin. Prandaj, faleminderit edhe për këtë”, i tha Rutte Trumpit në një takim shumëpalësh së bashku me Presidentin ukrainas Volodymyr Zelensky dhe udhëheqësit evropianë në Shtëpinë e Bardhë.

Duke folur më herët në Zyrën Ovale përkrah Zelensky-t, Trump nuk e përjashtoi menjëherë dërgimin e trupave amerikane në Ukrainë për të ndihmuar në ruajtjen e një marrëveshjeje të mundshme paqeje. “Do t’ju njoftojmë për këtë, ndoshta më vonë sot”, tha Trump.

Rutte falënderoi gjithashtu presidentin amerikan për “thyerjen e bllokimit” dhe për sjelljen me sukses të Presidentit rus Vladimir Putin në tryezën e bisedimeve të paqes.

LEXONI GJITHASHTU:

• Trump: Rusia do të pranojë garanci sigurie për Ukrainën
• Përfundojnë bisedimet, Trump dhe udhëheqësit evropianë bëjnë foton familjare