Kreu i opozitës ruse Alexei Navalny kthehet në Moskë pas helmimit me agjent nervor

Të dielën politikani opozitar dhe gazetari investigativ, Aleksei Navalni pritet të mbërrijë në Moskë, pasi ai qëndroi për disa muaj në Berlin për t’u rikuperuar pas sulmit me helmin e grupit Noviçok.

Navalny bëri të ditur vendimin e tij për tu rikthyer në Rusi të mërkurën, një ditë pasi shërbimet e burgjeve në Rusi kishin deklaruar se do të bënin gjithçka që ta arrestonin, duke e akuzuar mbi shkeljen e dënimit me kusht të vendosur nga gjykata në vitin 2014-të.

Dyzetekatërvjeçari, i cili mori avionin në Berlin në minutat e fundit para nisjes, për të evituar grumbullimet e gazetarëve deklaroi se ishte i lumtur që po kthehej në shtëpinë e tij së bashku me bashkëshorten, Julia Navalny.

“Dëshiroj të falënderoj Gjermaninë dhe dëshiroj t’iu falënderoj edhe ju të gjithëve. Shpresoj që fluturimi të shkojë mire. Jam i sigurt që çdo gjë do shkojë për së mbari. Sot jam shumë, shumë i lumtur. Mendoj se nuk do të më arrestojnë kur të mbërrij në Moskë. Kjo është e pamundur pasi unë jam një njeri i pafajshëm,” – tha Navalny.

Navalny, i cili shpreson në një sukses të mundshëm në zgjedhjet parlamentare të shtatorit, do të përballet me çështjet kriminale të ngritura ndaj tij, të cilat ai i cilëson si të motivuara politikisht.