Kriza nuk prek kreditimin, huaja e re u rrit në shifra rekord gjatë gushtit

Kriza e çmimeve dhe rritja e normave të interesit nga ana e bankave nuk kanë tërhequr kërkesën për kredi nga ana e bizneseve dhe individëve.

Të dhënat e Bankës së Shqipërisë për muajin gusht tregojnë se rreth 27 miliardë lekë u dhanë si kredi e re përgjatë kësaj periudhe, me një rritje prej 38 për qind në krahasim me vitin e kaluar.

Bizneset udhëhoqën rritjen e kreditimit, si në valutë, ashtu edhe në lekë. Rritje pati edhe kredia për individë, kryesisht për blerje pasurish të patundshme. Megjithatë, rritja në këtë kategori ishte më e ulët.

Në total, biznesi zgjeroi kredinë në 125 miliardë lekë në tetëmujorin e parë të këtij viti, ose rreth 30 për qind më shumë se e njëjta periudhë e vitit të kaluar. Kredia për individë u rrit me 15 për qind, duke shkuar në rreth 58 miliardë lekë.

Nga të dhënat e Bankës së Shqipërisë, gushti rezulton muaji me rritjen më të lartë të kredisë, ndërsa të dhënat e raportuara nga bankat e nivelit të dytë tregojnë gjithashtu edhe rritje të depozitave me një vlerë prej 30 miliardë lekësh në krahasim me 8-mujorin e vitit të kaluar.

Depozitat në euro mbeten të preferuarat, ndërsa ato në lekë patën një rritje më të ulët.

LEXONI GJITHASHTU:

• ‘Të mbytur’ nga euro, kredia në valutën europiane vijon rritjen në shifra rekord
• Shtrenjtohet kredia, rriten bonot e thesarit