Kryeministri anonim, qytetarët francezë shprehen se nuk e njohin kreun e ri të kabinetit

Jean Castex është emëruar sot nga presidenti francez për të krijuar kabinetin e ri qeveritar, por francezët duket se nuk e njohin kryeministrin e ri të vendit dhe shprehen skeptikë për rolin që i është caktuar. Disa parisienë, rrëfyen për Reuters se ata nuk e njihnin Castex dhe nuk ishin në gjendje të parashikonin se çfarë mund të bëjë ai.

“Jo në fakt nuk e njoh atë”, shprehet një qytetar.

Ndërsa të tjerë janë akoma të shqetësuar për largimin e Philippe, të cilin e vlerësonin si një kryeministër të suksesshëm.

“Nëse është dikush i ri, ai mund të sjellë një frymë të re për të gjithë. Por personalisht unë nuk isha dakord me dorëheqjen e Eduard Philippe.

Mendoj se ai e ka bërë punën e tij si duhet dhe se ishte një humbje e madhe për bashkëpunimin mes tij dhe Macron, mënyra se si ata punuan së bashku – njëri kishte një vizion strategjik ndërsa tjetri ishte operacional. Kjo ishte interesante”, thotë zyrtarja e Kontrollit të Cilësisë, Adele Schneeberger.

Castex ka punuar në zyrën e presidentit si këshilltar gjatë mandatit të Nicolas Sarkozy. Në vitin 2017, Castex punoi me Komitetin e Lojërave Olimpike 2024 dhe u emërua president i agjencisë kombëtare të sporteve.

Ai ka shërbyer si kryetar komune nga viti 2008 deri në vitin 2015, në qytetin jugor të Prades, me një popullsi prej 6,124 banorësh.