Kryeministri britanik për luftën në Iran: Raporti me Trumpin i mirë

Kryeministri i Britanisë së Madhe, Keir Starmer, këtë të hënë ka theksuar se marrëdhënia e tij me Presidentin amerikan Donald Trump është e mirë, ndërsa diskutimet mbi sigurimin e rrugës detare të Sundit të Hormuzit vazhdojnë.

Ai nënvizoi se vendimet e Mbretërisë së Bashkuar bazohen mbi interesin kombëtar dhe jo presionet e jashtme.

Starmer deklaroi se vendimi për të dërguar trupat britanike në zonat e rrezikshme është më i vështiri për çdo kryeministër, dhe se çdo veprim do të bëhet mbi një bazë ligjore dhe me një “plan të menduar mirë”. Ai theksoi se lidershipi i tij konsiston në “qëndrimin i fortë për interesat britanike, pavarësisht presionit”.

Duke folur për kostot e jetesës, Starmer tha se instinkti i tij është të “mbrojë qytetarët nga rritja e çmimeve”. Ai theksoi se mënyra më e thjeshtë dhe efektive për këtë është de-eskalimi i konfliktit në Lindjen e Mesme.

Në një paketë konkrete mbështetëse, qeveria britanike njoftoi një fond prej 53 milionë paundësh për familjet më të prekura që përdorin naftën për ngrohje. Masa të tjera përfshijnë: kufizimin e faturave të energjisë deri në fund të qershorit, zgjatjen e kufirit të akcizës së karburantit deri në shtator dhe mbështetje për komunitetet rurale. Starmer shtoi se vendi po punon gjithashtu për të rritur sigurinë energjetike afatgjatë.

Kryeministri dha përditësime mbi situatën në Lindjen e Mesme, duke theksuar se mbi 92,000 shtetas britanikë janë kthyer në vend përmes fluturimeve komerciale dhe chartere qeveritare. Ai nënvizoi se vazhdon mbështetja për qytetarët në Liban dhe se në Qipro ndodhen mijëra ushtarë britanikë, tre skuadrone avionësh luftarakë dhe ekipe kundër dronëve për të ndërhyrë ndaj sulmeve iraniane.

Në fushën diplomatike, Starmer përmendi vizitën e Sekretares për Çështjet e Jashtme, Yvette Cooper, si dhe takimet e tij me kryeministrin kanadez Mark Carney dhe presidentin ukrainas Volodymyr Zelensky. Ai shtoi se lufta në Lindjen e Mesme nuk duhet lejuar të bëhet një “avantazh për Putin” dhe se prioriteti i parë i Britanisë së Madhe mbetet mbrojtja e qytetarëve në rajon.