Kryeministri Johnson pritet të njoftojë shtyrjen e datës së rihapjes

Kryeministri britanik Boris Johnson pritet të njoftojë shtyrjen e heqjes së kufizimeve për parandalimin e përhapjes së COVID-19, ashtu siç qe planifikuar më parë për në datën 21 qershor.

Johnson iu tha mediave të dielën se qeveria po “sheh me vëmendje të dhënat”.

Ministri i Jashtëm Dominic Raab theksoi se qeveria kërkon të shmangë heqjen dhe rivendosjen e herëpashershme të masave gjatë një interviste për BBC.

“Duhet të orientohemi nga të dhënat dhe faktet”, teksa theksoi rëndësinë e “lidhjes kritike” që ekziston midis përhapjes së virusit dhe shtrimeve në spital si “çështjen më të rëndësishme për momentin”.

Plani prej katër hapash i Anglisë për të hequr kufizimet e mbetura mbi bizneset, përfshi baret, restorantet dhe klubet e natës, si dhe një sërë ceremonish si dasma e funerale, pritej të hynte në fuqi më 21 qershor.

Por nga ana tjetër, Mbretëria e Bashkuar po përjeton një valë të re infektimesh, kryesisht si pasojë e variantit Delta.

Britania regjistroi 7,500 raste të reja të dielën, rreth 50 për qind më shumë se javën e shkuar.

E kjo vjen pavarësisht shkallës së lartë të vaksinave të administruara në vend me rreth 78.9 për qind të popullsisë që kanë marrë të paktën një dozë, e 56 për qind të tjerë të imunizuar.

Autoritetet britanike kanë thënë se varianti – i cili u shfaq për herë të parë në Indi – është rreth 60 për qind më ngjitës dhe tani përbën 90 për qind të rasteve të reja në vend. Ata gjithashtu theksuan se vaksinimi shmang format e rënda të sëmundjes, por jo infektimin apo parandalimin e përhapjes tek të tjerët.