“Kumbari i fundit” kërkon lirinë, Messina Denaro në gjendje të rëndë shëndetësore

Matteo Messina Denaro, i etiketuar si “kumbari i fundit i mafias siciliane”, është shumë i sëmurë dhe me lejen e autoriteteve është nxjerrë nga qelia për t’u shtruar në spitalin e qytetit të Akuilas.

Sipas mediave italiane, bosi i Cosa Nostra-s, i prekur nga një tumor, është transferuar në qendrën spitalore nën masa të rrepta sigurie.

Avokatët e tij kanë kërkuar lirimin me argumentin se gjendja shëndetësore e tij është e papërshtatshme për regjimin e ashpër të burgimit.

“Për këtë arsye, ai duhet të lirohet menjëherë dhe të qëndrojë në spital”, ka deklaruar përfaqësuesi ligjor Alessandro Cerella për mediat italiane.

Bosi 61-vjeçar ishte personi më i kërkuar në Itali deri më 16 janar të këtij viti, kur u arrestua nga policia në qytezën siciliane Kampobelo di Macara, ku jetonte si i fshehur. Ajo çfarë ndihmoi autoritetet ta gjenin atë ishte pikërisht sëmundja e tij tumorale.

Për tre dekada me radhë, Denaro i kishte shpëtuar dënimit me burg për krimet e shumta që ka kryer, përfshirë masakrat e viteve ’92 dhe ’93. Ndërsa tani po vuan burgimin e përjetshëm.

Ai ishte operuar për një kancer në zorrën e trashë në vitet 2020 dhe 2022, përpara se të arrestohej. Gjithashtu në fund të qershorit, Drejtoria Italiane e Burgjeve e lejoi atë të linte qelinë për t’iu nënshtruar një tjetër ndërhyrjeje kirurgjike.

LEXONI GJITHASHTU:

• Mbronin bosin italian, arrestohen dhe dy mbështetësit e Matteo Messina Denaro
• 31 vite nga vrasja e Paolo Borsellino, Denaro u dënua me burgim të përjetshëm