Kush është Armin Laschet, avokati dhe gazetari që synon të pasojë Merkel si kancelar

Armin Laschet, kryeministri i shtetit më të populluar të Gjermanisë, Nordrhein-Westfalen është kandidati i CDU për të pasuar Angela Merkel në detyrën e kancelarit të Gjermanisë.

Laschet shpreson që kredencialet e tij si një menaxher i sprovuar dhe i besuar me pikëpamje centriste do të kompensojnë më shumë mungesën e karizmës personale.

Sidoqoftë, sondazhet e tregojnë se ai mbetet prapa rivalit të tij kryesor, kandidatit të Social- Demokratëve Olaf Scholz.

Në fillim të këtij muaji, Merkel në parlament bëri një thirrje të pasionuar ndaj votuesve gjermanë që të mbështesin Laschet, pasi një sondazh tregoi se mbështetja për konservatorët kishte rënë në nivelin më të ulët të të gjitha kohërave.

Por premtimi i Laschet për “qëndrueshmëri” nuk po arrin të jehojë me votuesit e shqetësuar për ndryshimet klimatike, emigracionin dhe pandeminë COVID-19.

60-vjeçari me profesion jurist dhe gazetar, është një politikan gazmor dhe i përzemërt që flet me një theks rajonal dhe ndihet rehat duke theksuar bipartizmin dhe miqësinë. Laschet ka kërkuar të bashkojë krahun e majtë dhe të djathtë të partisë së tij.

Laschet kaloi gjashtë vjet në Bruksel nga 1999 deri në 2005, duke shërbyer si eurodeputet për Partinë Popullore Evropiane. Gjatë asaj kohe, ai u përqendrua kryesisht në politikën e jashtme, marrëdhëniet ndërkombëtare dhe çështjet e buxhetit. Laschet herë pas here ka kritikuar qeverinë e Merkel, pasi nuk ka qenë shumë ambicioze në lidhje me Evropën. Sidoqoftë, ai përgjithësisht shihet si një pasues i politikave të Merkel.

Laschet konsiderohet nga disa kritikë si një person që mban një qëndrim të butë ndaj Rusisë së Vladimir Putin. Ai vlerësohet se ka një linjë të butë ndaj Kinës, pasi mbrojtja e industrive eksportuese gjermane ka qenë një nga shqetësimet e tij më të mëdha. Përtej Kinës dhe Rusisë, Laschet ka thënë se Gjermania nuk është lojtari gjeopolitik pasiv për të cilin SHBA dhe fuqitë e tjera shpesh ankohen. “Ne jemi aktivë ndërkombëtarisht”, ka theksuar Laschet.

Në vitet  2005-2010 Laschet ka ushtruar detyrën e ministrit për Gratë, Familjen dhe Integrimin në North Rhine-Westphalia. Gjatë detyrës së tij, Laschet formoi marrëdhënie të afërta me turqit në rajon dhe kontribuoi në miqësinë turko-gjermane.

Laschet është baba i tre fëmijëve. Në vitin 2017 ai u bë kryeministër i North Rhine-Westphalia, që ka numrin më të madh të banorëve në Gjermani, rreth 18 milionë. Ai u zgjodh kryetar i përgjithshëm i CDU-së më 16 janar 2021 dhe tanimë shpreson të jetë kancelar i Gjermanisë.

LEXONI GJITHASHTU:

• Fundi i epokës Merkel, Gjermania voton sot për të zgjedhur kancelarin e ri
• Kush është Olaf Scholz, kandidati i SPD-së që premton një ekonomi digjitale e të gjelbër