Lampeduza, turistët shijojnë plazhet: Asnjë problem me refugjatët

Pushuesit në Itali po shijojnë lehtësimin e masave në plazhin e ishullit jugor të Lampeduzës, pavarësisht fluksit ditor të emigrantëve.

Emigrantët, shumica nga Afrika, kanë mbërritur përditë në ishullin sicilian dhe po transferohen vazhdimisht nga qendra e pritjes për të shmangur përqendrimin e tyre në një vend të vetëm.

Roberta Marchetti është pronare e një qendre zhytjeje në ishull. Ajo thotë se bizneset lokale kanë qenë të prekura nga fluksi i emigrantëve, por tani vizitorët i shohin ata gjithnjë e më pak.

“Gjatë pushimeve këtu nuk do t’i shihni emigrantët. Fatkeqësisht ideja për praninë e tyre ka prekur shumë biznese në ishull, por është vetëm një imagjinatë se Lampeduza është e mbushur me emigrantë dhe nuk ke ku të pushosh. Kjo nuk është e vërtetë”, – tha Marchetti.

Teksa sezoni veror ka filluar, turistët kanë shijuar kalimin e ditëve të nxehta në plazhet e famshme të ishullit, duke u freskuar në detin me ujëra të kristalta dhe duke qëndruar nën hijet e çadrave.

“Ishulli është i bukur, deti i mrekullueshëm. Jeta këtu është e qetë dhe po shijojmë ushqimin. Nuk kemi parë shumë emigrantë, për të cilët flitet dhe jemi të kënaqur. Do t’ia rekomandoja ishullin të gjithëve”, – një shtoi Nicola Guerra, turist nga San Marino.

Lampeduza është një nga pikat kryesore për emigrantët që duan të arrijnë Evropën. Që nga fillimi i vitit ka pasur një rritje të mbërritjeve, me 19.360, shumë më tepër se shifra prej 6185 e konstatuar në të njëjtën periudhë të vitit të kaluar.

LEXONI GJITHASHTU:

• Austria dhe Holanda heqin kufizimet e udhëtimeve me Shqipërinë
• Poli Loman: Shqipëria, vend fantastik për turizëm, mangësi në shërbim dhe infrastrukturë
• Blendi Klosi: Kemi shfrytëzuar vetëm 1/3 e potencialit në turizëm