Liderët e BE nënshkruajnë marrëveshjen tregtare historike me Britaninë e Madhe

Marrëveshja e shumëpritur post-Brexit është nënshkruar nga krerët e BE.

E quajtur zyrtarisht Marrëveshja Tregtare dhe e Bashkëpunimit BE-Mbretëri e Bashkuar, finalizimi i saj ka marrë muaj të tërë negociatash për t’u dakordësuar.

Presidenti i Këshillit Europian, Charles Michel dhe presidentja e Komisionit Europian, Ursula von der Leyen e nënshkruan të mërkurën në mëngjes në emër të Bashkimit Europian.

Marrëveshja do të dërgohet në Londër me një avion të Forcës Ajrore Mbretërore, ku kryeministri Boris Johnson do ta nënshkruajë për palën angleze.

Liderët europianë e mirëpritën marrëveshjen, duke e përshkruar atë si një çast me “rëndësi historike”, një “gurthemeli të rëndësishëm” dhe një “hap madhor përpara”.

Por shumëkush pret skeptik ndryshimet në marrëdhënien aktuale, të cilat do të hyjnë në fuqi më 1 janar.

Nënshkrimi i marrëveshjes të mërkurën vjen përpara se deputetët britanikë dhe ata europarlamentarë të votojnë për ta ratifikuar atë apo jo.