Vendimi i Kushtetueses mbi ligjshmërinë e zgjedhjeve lokale, Mejdini: Kemi nevojë për një precedent, cilido qoftë ai

Gjykata Kushtetuese ka në dorë vendimin për legjitimitetin e zgjedhjeve të 30 qershorit 2019.

Gazetarja Fatjona Mejdini tha për gazetaren Ilva Tare se vendimi i Kushtetueses, cilido qoftë ai, do të sjellë një zhvillim pozitiv për vendin, pasi do të mbyllë një kapitull të së shkuarës.

Ajo solli në vëmendje faktin se mbajtja e këtyre zgjedhjeve solli edhe një kusht të shtuar për Shqipërinë nga Bundestagu, që ishte vendosja e legjitimitetit të zgjedhjeve të mbajtura në qershor 2019. Për këtë arsye, sipas saj, është e nevojshme të vendoset një precedent.

“Nëse Kushtetuesja anulon zgjedhjet ose mbeten në fuqi do të kemi legjitimitetin e përcaktuar të zgjedhjeve lokale dhe do të mbyllet një kapitull me këtë vendim. Është një rast interesant se kemi shoqatën e bashkive që bën ankimimin.

Kemi pasur një lloj agresioni nga shoqata e autonomisë vendore, që është shoqata e bashkive socialiste, për t’u tërhequr. Ka pasur një lloj presioni politik ndaj kësaj shoqate. Kjo është e panevojshme pasi është e nevojshme të vendoset një precedent”, u shpreh gazetarja Mejdini.