Në ”Ilva Now” diskutohet efekti i listave në zgjedhje

Partitë politike paraqitën mbrëmjen e së hënës, në tejkalim të afateve për dorëzimin e listave të kandidatëve për deputet, propozimet e tyre për parlamentin e ardhshëm.

Për drejtuesen e Institutit për Demokraci Media dhe Kulturë, Jonila Godole, nga listat e kandidatëve ajo e Partisë Socialiste ishte “surprizuese në formë”, por “jo në përmbajtje politike”. Nga ana tjetër ajo e cilësoi gjithashtu jo “kush e di çfarë” edhe listën e kandidatëve të PD-së, për të cilën ajo tha se qytetarët në përgjithësi kishin pritshmëri më të mëdha.

Drejtuesi i Infocip, Gerti Shella ishte i një tjetër mendimi, sipas tij risitë ishin te lista e kandidatëve të PS-së, ndërkohë që ngriti pretendimin se me sistemin e ri zgjedhor “listat janë formalisht të hapura”.

Lexoni më shumë: Jonila Godole: Lista e kandidatëve të PS-së surprizuese vetëm në formë, jo në përmbajtje

Kandidati i PD-së për deputet, Agron Shehaj u shpreh i vlerësuar për listimin në qarkun e Tiranës. Nga ana tjetër ai kritikoi PS-në për kandidimin e disa kandidatëve me lidhje të dyshimta dhe ndaj të cilëve rëndojnë akuza për abuzime me detyrën apo përfshirje në manipulim votash. Për këtë pjesë ai përmendi kandidatët e PS-së për Durrësin dhe ish-ministrin Damian Gjiknurin, për të cilin kujtoi se rëndojnë akuza konkrete.

Lexoni më shumë: “Gjiknuri duhet të ishte para drejtësisë”, Shehaj: Rama u paraqet njerëzve grupin e skuadrës së korrupsionit

Për juristin Denar Biba pozicionimi në lista në vende poshtë të zakonshmes për emra ministrash apo ish-ministrash nuk i rrezikon ata për të mos-qenë deputetë në parlamentin e ardhshëm. Sipas tij nuk është e vërtetë që listat janë “formalisht të hapura”, pasi vota preferenciale dhe mirënjohja e këtyre politikanëve mund të bëjë që ata të ngjiten sipër në listën përfundimtare.

Lexoni më shumë: Analiza e Denar Bibës: Sa vota i duhen Pandeli Majkos që të mos mbesë jashtë Parlamentit

Jonila Godole riktheu në vëmendje mos-përfshirjen e diasporës sërish në procesin zgjedhor. Ajo e konsideroi si dështim të madh për të gjitha palët dhe tha se përfshirja e emigrantëve do të ndryshonte rrënjësisht “lojën politike” në Shqipëri, me gjasa edhe vetë përbërjen e listave të kandidatëve.

Lexoni më shumë: Mos-përfshirja e diasporës në zgjedhje, Godole: Dështim për të gjitha palët, do ndryshonte tërësisht lojën politike

Qëndrimi i Shehajt, se politikanët e akuzuar për abuzime dhe trafik droge nuk duhet të përfshihen më në politikë, nxiti debate me Bibën. Ky u pajtua me të në parim, por i kujtoi Shehajt se në radhët e PD-së ka pasur gjithashtu të akuzuar, madje dhe me çështje gjyqësore të mbyllura në mënyra të diskutueshme, por pavarësisht kësaj ata vijojnë të jenë në politikë.

Lexoni më shumë: Morali i kandidimit të akuzuarve nxit debat mes Denar Bibës dhe Agron Shehajt