Luftë diplomatike Rusi-BE, Moska dëbon 7 diplomatë nga Sllovakia dhe vendet baltike

Rusia ka urdhëruar një grup prej 7 diplomatësh nga tre vendet baltike dhe Sllovakia që të largohen nga vendi, në një përgjigje reciproke ndaj dëbimit të punonjësve të ambasadës ruse nga këto shtete.

Ministria e Jashtme Ruse thirri ambasadorët përkatës për të urdhëruar dëbimin e tre diplomatëve nga Sllovakia, dy nga Lituania, një nga Estonia dhe një tjetër nga Letonia brenda një jave.

Veprimi i Kremlinit shënon kështu vazhdimin e luftës diplomatike mes Rusisë dhe vendeve të ndryshme evropiane, që nisi më herët gjatë muajit, kur Republika Çeke dëboi 18 diplomatë rusë për përfshirje në akte spiunazhi, konkretisht për shpërthimin masiv në një depo municionesh në vitin 2014.

E irrituar nga ky vendim, Moska zyrtare përveç se mohoi përgjegjësinë e shpërthimit, dëboi edhe 20 diplomatë çekë nga vendi.

Krahas luftës diplomatike, marrëdhëniet mes Perëndimit dhe Rusisë janë tensionuar më tej nga paralajmërimet për sanksione për shkak të burgimit të kritikut të Kremlinit, Alexei Navalny.