Magji në qiell, në Finlandë turistët dhe banorët shijuan spektaklin e dritave veriore

Vendasit dhe turistët në qytetin Rovaniemi në Lapland të Finlandës patën fatin dhe mundësinë të shijojnë magjinë e dritave veriore, të shfaqura në qiellin Arktik gjatë fundjavës. Dritat veriore, të njohura gjithashtu si aurora borealis, filluan vallëzimin e tyre rreth orës 10:30  duke u ofruar pamje unike fotografëve vendas dhe disa turistëve që vizitojnë Lapland në Finlandën veriore.

Aurora vijoi për disa orë dhe ndërsa dukej sikur shfaqja po mbaronte rreth orës 2 të mëngjesit, ajo u kthye edhe më e fortë, duke ndriçuar qiellin pa ndërprerje për më shumë se 30 minuta në një mori ngjyrash fluoreshente.

Fundi i Shtatorit është një kohë e mirë për të dalluar dritat veriore. Por si krijohen ato?

Dritat e Veriut krijohen si rezultat i përplasjeve të grimcave të gazta në atmosferën e Tokës, me grimca të ngarkuara me elektricitet, që janë çliruar nga atmosfera e Diellit. Ngjyra më e zakonshme aurorale, një jeshile e zbehtë në të verdhë, prodhohet nga molekulat e oksigjenit që ndodhet rreth 96 kilometra mbi Tokë.

Dritat aurorale shfaqen në shumë ngjyra, por jeshilja e zbehtë dhe roza janë ngjyrat më të zakonshme. Ngjyrat shfaqen në shumë forma, që nga retë e shpërndara e deri tek harqet, apo rreze vezulluese që ndriçojnë qiellin me një shkëlqim të magjishëm.