Marrëveshja post-Brexit, BE paralajmëron Britaninë: Shkelje e një detyrimi të mirëbesuar

Bashkimi Europian i ka dërguar Britanisë një letër që e njofton për shkeljen e marrëveshjes post-Brexit dhe i kërkon të rishikojë këtë konflikt deri në fund të muajit tetor.

Marrëveshja e shkelur nënvizonte se Britania të hiqte dorë nga disa pjesë problematike të projektligjit për tregun e brendshëm, që mund të cenonin protokollin lidhur me Irlandën e Veriut.

“Siç e dini, ne i kishim ftuar miqtë tanë britanikë që deri në fund të shtatorit të hiqnin pjesët problematike të projektligjit të tyre të tregut të brendshëm. Ky projektligj është nga natyra një shkelje e detyrimit të mirëbesuar dhe përcaktuar nga marrëveshja e tërheqjes. Për më tepër nëse ky projektligj miratohet do të jetë në kundërshtim të plotë me protokollin lidhur me Irlandën. Afati për Britaninë mbaroi dje”, – tha Ursula von der Leyen, presidente e Komisionit Europian.

Nëse nuk arrihet një marrëveshje, kjo mund të çojë në vendosjen e taksave për tregtinë në kufijtë e Britanisë dhe Irlandës që është pjesë e Bashkimit Europian.  

“Komisioni ka vendosur t’i dërgojë qeverisë së Mbretërisë së Bashkuar një letër-njoftim formal. Ky është hapi i parë që ndërmerret në një procedurë shkeljeje. Letra fton qeverinë britanike të dërgojë deklaratat e saj brenda muajit. Krahas kësaj, Komisioni do të punojë fort për sa i përkwt zbatimit të plotë dhe në kohë të marrëveshjes së tërheqjes. Ne i qëndrojmë besnik zotimeve tona”, – u shpreh znj. Von der Leyen.

Letër-njoftimi ka hapur një proces zyrtar lidhur me polemikat e kësaj çështjeje, e cila mund të përfundojë me sanksione nga Bashkimi Europian kundër Britanisë.