Masa e karantinës për emigrantët para zgjedhjeve, Rakacolli: Jo me prapavijë politike

Zëvendësministrja e Shëndetësisë Mira Rakacolli dhe drejtori i Urgjencës Kombëtare, Skënder Brataj, theksuan për Euronews Albania se masa e karantinës së detyrueshme për emigrantët përpara zgjedhjeve nuk kishte prapavijë politike.

Në emisionin “Ilva Now” Rakacolli e Brataj u shprehën se kur kjo masë u vendos më 19 prill ekspertët kishin vënë re një “mesatare javore incidence të infeksionit” shqetësuese nga Greqia dhe Maqedonia e Veriut: 4,000 nga Greqia dhe 2,700 nga Maqedonia e Veriut.

“Ne s’e dinim a do të vinin apo jo njerëz për votime, por kishim përvojën e festave të shkuara, ku për pashkët [ortodokse] kanë ardhur numër i madh njerëzish sidomos nga Greqia dhe për krishtlindje kishim shumë raste të mbartura [që erdhën] nga Greqia,” – u shpreh Rakacolli.

Gazetarja Ilva Tare i kërkoi zëvendësministres shpjegime se përse kjo masë nuk u aplikua më parë për pashkët katolike, të cilat u mbajtën më 4 prill, por doktor Brataj u përgjigj se nga Italia asokohe “nuk kishte të dhëna të ngjashme”.

E diela e pashkëve ortodokse u kremtua këtë vit më 2 maj, 8 ditë pas zgjedhjeve parlamentare, 14 ditë pas masës kufizuese të vendosur nga Komiteti Teknik i Ekspertëve.

Opozita ka ngritur pretendimin se masa kufizuese u vendos politikisht për të ndaluar emigrantët nga Greqia dhe punonjësit sezonal në Maqedoninë e Veriut që të votojnë në zgjedhjet e 25 prillit. Por zëvendësministrja Rakacolli këmbënguli se masat nuk kanë pasur prapavijë politike.

LEXONI GJITHASHTU:

• Asnjë i shtruar në spitalin infektiv? Skënder Brataj sqaron lajmin e njoftuar ditë më parë
• Zv.ministrja Rakacolli: Ende s’është arritur imuniteti i popullatës ndaj COVID-19
• Alimehmeti: Koncepti i imunitetit të komunitetit është i rrezikshëm, infektimi gjithmonë i mundur
• Hyrje-daljet për turizëm, Rakacolli: Mendojmë të mos vendosim masa për ata që do vijnë në Shqipëri
• A ka hyrë varianti indian i coronavirus në Shqipëri? Brataj përgjigjet në “Ilva Now”