Mbahen zgjedhjet e parakohshme në Portugali

Portugezët kanë nisur votimin e hershëm në zgjedhjet e parakohshme të përgjithshme.

Më shumë se 300 mijë persona janë regjistruar për të votuar më herët, ndërsa pjesa tjetër do të votojë pas një jave.

Kryeministri Antonio Costa, i cili ka udhëhequr për dy mandate që nga 2015, ishte një nga personat që votoi këtë të diele.

“Votimi është momenti më i rëndësishëm i demokracisë. Është një çast unik ku vetëm qytetarët vendosin cili do të jetë rezultati i zgjedhjeve, çfarë ata duan për të ardhmen e tyre, duke zgjedhur përfaqësuesit. Pjesëmarrja në procesin zgjedhor është akti më i rëndësishëm i jetës demokratike dhe dua t’i apeloj gjithë portugezëve të ushtrojnë sot të drejtën e tyre, nëse janë regjistruar për votimet e hershme ose pas një jave”, u shpreh António Costa, kryeministër i Portugalisë.

Zgjedhjet e parakohshme u thirrën pasi kryeministri nuk ia doli të siguronte mbështetje për buxhetin e propozuar për 2022.

Kjo ishte hera e parë që prej 1974 që një buxhet refuzohej.

Këto zgjedhje mund të bëjnë që partia e ekstremit të djathtë, Chega, që u fut në parlament për herë të parë me vetëm një mandat në zgjedhjet e 2019, të përfitojë më shumë.

Sondazhet i japin thuajse 7% mbështetje, që do ta bënte këtë parti forcën e tretë më të madhe në parlament.