Grafika: 10 vendet më të prekura nga COVID-19 në botë deri më tani

Kanë kaluar 202 ditë që kur Organizata Botërore e Shëndetësisë shpalli zyrtarisht gjendjen e pandemisë.

Virusi vdekjeprurës i ka marrë jetën më shumë se 1 milion personave në botë, ndërsa numri i të infektuarve është 33,311,425, sipas të dhënave nga Worldometers. 

Euronews sjell këto grafika ku shpjegohet se cilat vende kanë pasur më shumë viktima deri më tani.  

Lista e kryeson SHBA me 209,453 viktima që nga fillimi i pandemisë, ndërsa Brazili është aktualisht vendi i dytë më i prekur në botë nga coronavirusi me 141,776 viktima.

Edhe India ka shënuar një numër të lartë personash të cilët nuk i kanë mbijetuar dot pandemisë (95,574) ashtu si dhe Meksika.

Katër vendet europiane me vdekshmërinë më të lartë janë: Mbretëria e Bashkuara, Italia, Franca dhe Spanja.

Për sa i përket vdekjeve për 100 mijë banorë, Belgjika, Andorra dhe Spanja renditen si vendet me më shumë viktima në Europë, respektivisht me 88.2, 73.9 dhe 67.3.

Virusi nuk ka kursyer vendet europiane, të cilat për një kohë qenë epiqendra e pandemisë.

“Do të bëhet më e vështirë. Do të ketë më shumë viktima në tetor dhe nëntor”, tha më 14 shtator Hans Kluge, drejtori i OBSH për Europën.