Mbi 50 milionë të prekur në botë me COVID-19, në Greqi shqetësuese situata në spitale

Më shumë se 50 milionë të prekur me COVID-19 në të gjithë botën, janë këto të dhënat më të fundit nga universiteti John Hopkins sa i përket situatës së pandemisë.

SHBA, India dhe Brazili janë vendet që raportojnë shifrat më të larta. Por edhe situata në Evropë është shqetësuese. Duke nisur nga kjo e hënë, Portugalia imponon një shtetrrethim të ri në një përpjekje për të luftuar numrin e lartë të rasteve me COVID-19.

Në fillim të muajit tetor vendi hyri në gjendjen e emergjencës për shkak të trefishimit të të infektuarve. Kryeministri tha se mënyra e vetme për të kontrolluar pandeminë është të shmanget ndërveprimi shoqëror.

“Situata ishte shumë e vështirë gjatë valës së parë kur kemi pasur një numër të lartë shtrimesh në spital të cilat, në momentin më të kulminant, arritën në 1,300 persona. Sot situata është shumë më e rëndë sepse kemi 2,420 njerëz në spitale”, tha kryeministri i Portugalisë Antonio Costa.

Gjatë fundjavës, Greqia hyri sërish në izolim. Në shtetin fqinj është raportuar për më shumë se 47 mijë të infektuar, por ajo që i shqetëson autoritetet është rritja e të shtruarve në kujdesin intensive. Numri i pacientëve që aktualisht ndodhen në ventilator është dyfishuar në vetëm një muaj.

Zvicra po reagon duke thirrur në ndihmë edhe ushtrinë. Më shumë se 2500 trupa janë mobilizuar për të ndihmuar sistemin shëndetësor për të kryer sa më shumë testime. Masa vjen ndërsa qeveria kërkon të rrisë kapacitetin me disa spitale në rajonet më të prekura, pasi në shumë pika të kujdesit intensiv ka mbingarkesë. Por rivendosja e izolimeve vijon të shoqërohet edhe me protesta. Gjatë fundjavës me qindra qytetarë kanë protestuar në Madrid, Laipcig, Bukuresht. Në Zagreb po ashtu protestuesit kundërshtuan masat kufizuese duke e cilësuar  pandeminë mashtrim.

“Nuk jemi aspak të kënaqur me masat, veçanërisht me mbajtjen e maskës. Unë punon në sektorin e turizmit dhe ne po shkatërrohemi nga këto kufizime. Nuk mund të punojmë normalisht”, u shpreh një protestues.

“Pandemia nuk ekziston. Njerëzit janë të frikësuar nga diçka që nuk ekziston, ky është opinioni im”.

Lexoni gjithashtu:

Vala e dytë e COVID-19: Sllovakia nis testimet masive, numër rekord viktimash në Kroaci

Pandemia rëndon gjendjen me Covid-19 në Kosovë

26 viktima në 24 orë në Maqedoninë e Veriut nga COVID-19

Shifra rekord, mbi 500 persona të infektuar me COVID-19 në 24 orë