Mbi 55 mijë familje mund të preken nga rritja e çmimit të energjisë

Rritja e çmimit të energjisë elektrike për familjet që konsumojnë më shumë se 700 kw/orë në muaj do të prekë mbi 55 mijë familje.

Sipas të dhënave konfidenciale të siguruara nga Euronews Albania, në një studimin paraprak të kryer nga kompania e shpërndarjes së energjisë OSHEE, konstatohet se 5% e abonentëve familjarë marrin energji mbi këtë fashë.

Të njëjtat burime sqarojnë se është duke u diskutuar një çmim energjie mes vlerave 13 deri në 14 lekë/kilovat orë për familjarët që shpenzojnë mbi këtë kufi.

Por fjalën e fundit në kërkesën që do të dërgojë OSHEE-ja, do ta ketë Enti Rregullator i Energjisë Elektrike që merr vendimin për çmimet.

Euronews Albania pyeti pranë këtij institucioni, por zyrtarë të ERE-së thanë se akoma nuk kanë një kërkesë, ndërsa lanë të hapur mundësinë për të vendosur një çmim me fasha konsumi, siç ka qenë modeli i para 7 vitesh.

Vendimi pritet të frenojë konsumin e energjisë në kohën e krizës së çmimeve të larta, pasi konsumatorët familjarë zënë vetëm gjysmën e totalit të energjisë elektrike.

Aktualisht OSHEE-ja faturon 1 milion e 270 mijë abonentë, ndërsa konsumi mesatar vjetor i të gjitha familjeve është 230 kw/orë në muaj.

LEXONI GJITHASHTU:

• Avrami: Energjia nga TEC-et lundruese kosto më të ulët se importi
• 60% e familjeve shqiptare do paguajnë më shtrenjtë energjinë, sipas ekspertit