Mbi 80 mijë viktima nga COVID-19 në Mbretërinë e Bashkuar, shtohen vaksinimet

Rreth 2 milionë qytetarë janë vaksinuar kundër COVID-19 në Mbretërinë e Bashkuar, tha të dielën sekretari për shëndetësinë Matt Hancock.

“Në dy javët e fundit kemi vaksinuar më shumë persona se në gjithë dhjetorin, por do ta përshpejtojmë edhe shumë fushatën”, tha ai për BBC.

Britania synon të vaksinojë rreth 14 milionë qytetarë deri në mes të shkurtit, duke përfshirë personat mbi moshën 70-vjeç dhe ata me sëmundje shoqëruese, si dhe stafin shëndetësor.

Hancock tha se në ditë po vaksinohen rreth 200 mijë persona, duke mundësuar lehtësimin e masave në muajt e pranverës.

Më shumë se 80 mijë persona kanë humbur jetën në Britani, teksa shteti renditet në vend të pestë në rang global për shkallën e vdekshmërisë.

Me shfaqjen e variantit të ri të coronavirusit në Mbretërinë e Bashkuar, kryeministri Boris Johnson ashpërsoi masat duke vendosur një shtetrrethim të tretë në Angli.

I pyetur nëse qeveria planifikon të prezantojë masa të reja, Hancock tha se nuk dëshiron të “spekulojë” por mesazhi i thjeshtë është “që qytetarët duhet të qëndrojnë në shtëpi dhe të respektojnë masat në fuqi”.

Lexoni gjithashtu 

• Vaksinohet mbretëresha Elisabet, Papa Françesku shprehet i gatshëm
• Londra pranë kolapsit, kryebashkiaku Sadiq Khan shpall “incidentin madhor”
• ‘Ndarje e drejtë e vaksinës’, apeli i kreut të OBSH-së: Të mos lihen pas vendet e varfra