Mbyllet Capitol Hill, nervozizëm para ceremonisë së betimit të Biden

Kompleksi Capitol Hill në Uashington u izolua tërësisht përreth një orë ditën e hënë për shkak të një zjarri që ra në rrethinat e tij, ngjarje që vuri edhe njëherë në dukje nervozizmin në prag të ceremonisë së inaugurimit të presidentit të zgjedhur Joe Biden.

Policia lokale deklaroi pak momente më vonë se zjarri ishte vënë nën kontroll dhe se Kongresit dhe godinave të tjera zyrtare nuk u kanosej asnjë rrezik.

“Zjarrfikësit vunë nën kontroll një zjarr të vogël, nga i cili nuk mbeti i lënduar askush dhe nuk ka asnjë rrezik”, thuhej në një komunikatë.

Izolimi vjen megjithatë pas sulmit të 6 janarit nga mbështetësit e presidentit në ikje Donald Trump, me disa prej tyre që bënin thirrje edhe për vdekjen e zëvendës presidentit republikan Mike Pence, i cili udhëhoqi seancën e certifikimit të fitores së Biden në zgjedhjet e nëntorit.

Biden do të marrë detyrën në ceremoninë e së mërkurës dhe masat e sigurisë përreth zonës së Kongresit vazhdojnë të mbeten të larta.

Një grup personash që po simulonin ceremoninë në fjalë u morën në mbrojtje nga agjentët.

Fundjavën e kaluar, një person i armatosur me një pistoletë të mbushur dhe i pajisur me 500 fishekë u arrestua teksa tentonte të thyente perimetrin e kontrolluar nga efektivët e Gardës Kombëtare.