Mijëra penisë gomarësh u kapën në një operacion kontrabandë

Zyrtarët nigerianë kanë sekuestruar mijëra penisë gomarësh që do të eksportoheshin në Hong Kong.

Megjithëse kapja e organeve gjenitale të gomarit është e rrallë, lëkurat e gomarëve kontrabandohen shpesh në vende si Kina dhe gjejnë përdorim në mjekësinë tradicionale.

Kjo tregti e paligjshme po zvogëlon në mënyrë drastike numrin e gomarëve në Nigeri, ndërkohë që pjesa më e madhe e popullsisë i përdor ata si kafshë pune.

Një total prej 16 thasë me organe gjenitale u sekuestruan javën e kaluar në aeroportin ndërkombëtar në Lagos, qyteti më i madh i Nigerisë.

Çfarë fshihet pas tregtisë së paligjshme të pjesëve të gomarit?

Organizata bamirëse britanike The Donkey Sanctuary vlerëson se rreth 4.8 milionë gomarë trafikohen dhe vriten çdo vit për lëkurën e tyre. Shumë prej tyre përdoren për të prodhuar ejiao, një ilaç tradicional kinez.

Në korrik, dogana nigeriane sekuestroi lëkurë gomari me vlerë 114 mijë euro.

Përpjekjet për të frenuar këtë praktikë përfshijnë një propozim të vitit 2021 nga senatorët për të ndaluar vrasjen e gomarëve. Kjo ende nuk është miratuar në ligj.

Kafsha po përballet me zhdukjen në Nigeri dhe nuk mund të shumohet në numër të madh për shkak të shkallës së ulët të pjellorisë.

Sipas shërbimit doganor, ka nisur hetimi për të mësuar më shumë në lidhje me penisët e sekuestruar.

LEXONI GJITHASHTU:

• ‘I dashur gomar’, libri që ngjall debate, i dha zë të akuzuarit për ngacmim