Milano–Cortina 2026: Dronë dhe inteligjencë artificiale në çdo garë olimpike

Lojërat Olimpike Dimërore Milano–Cortina 2026 pritet të shënojnë një kthesë të rëndësishme teknologjike në mënyrën se si publiku ndjek garat. Nga përdorimi i dronëve me pamje, te ritransmetimet e avancuara me inteligjencë artificiale, teknologjia do të jetë elementi kryesor i këtij edicioni olimpik.

Sipas organizatorëve, këto risi do ta transformojnë përvojën e shikuesve, jo vetëm përmes transmetimeve televizive, por edhe përmes chatbot-ëve të fuqizuar nga AI dhe përmbajtjeve në rrjetet sociale.

Lojërat Milano–Cortina do të shënojnë një përdorim shumë më intensiv të dronëve të cilët do të ndjekin atletët në distancë shumë të afërt. Synimi është që publiku të ndihet sikur ndodhet vetë në pistë, krah atletëve.Përveç dronëve, OBS po integron inteligjencën artificiale në ritransmetime.

Përmes kombinimit të pamjeve nga disa kamera, AI mund të krijojë video 260-gradëshe brenda pak sekondash. Në momente kyçe, si gjatë një kërcimi në ski, pamja ngrin në ajër dhe shfaq analiza vizuale të pozicionit të atletit, të shoqëruara me të dhëna si lartësia e kërcimit, koha në ajër dhe shpejtësia e uljes.

Për herë të parë, faqja zyrtare e Lojërave Olimpike do të ketë një asistent të integruar me inteligjencë artificiale, i cili do të përgjigjet në pyetje dhe do të ofrojë rezultate në kohë reale. Ky asistent është trajnuar vetëm me të dhëna zyrtare olimpike, duke garantuar informacion të saktë dhe të paanshëm.

Gjithashtu, faqja do të ofrojë përmbledhje lajmesh dhe momente kryesore të krijuara nga AI, për t’i ndihmuar tifozët të informohen shpejt dhe të zgjedhin çfarë përmbajtjeje të ndjekin.

Një sistem monitorimi me inteligjencë artificiale do të përdoret sërish për të identifikuar dhe raportuar mesazhet fyese ndaj atletëve në rrjetet sociale, duke rritur mbrojtjen e tyre gjatë Lojërave.

Atletët do të kenë në dispozicion aplikacione si Athlete365 për komunikim dhe bashkëpunim, si dhe Get Set, Train Smarter, i fokusuar në parandalimin e dëmtimeve gjatë stërvitjes.

Do të rikthehet gjithashtu iniciativa “Momenti i Atletit”, që u mundëson sportistëve të lidhen drejtpërdrejt me familjarët dhe miqtë menjëherë pas përfundimit të garës.

Ndërkohë, organizatorët kanë prezantuar edhe një dizajn të ri të pishtarit olimpik dhe paralimpik, i cili demonstron teknologjinë që siguron që flaka të qëndrojë e ndezur në çdo kusht.