Ministri i Jashtëm italian: Nuk mendoj se Trump dëshiron të pushtojë Groenlandën

Ministri i Jashtëm italian, Antonio Tajani ka folur lidhur me deklaratat e presidentit amerikan, Donald Trump për të marrë nën kontroll Groenlandën. Tajani është shprehur se nuk mendon se Trump dëshiron të pushtojë Groenlandën.

“Nuk mendoj se Trump dëshiron të pushtojë Groenlandën. Marco Rubio, duke folur para ligjvënësve republikanë, tha se ata mund të duan ta blejnë atë, por duhet të shohim se çfarë do të thotë saktësisht kjo”, tha ai.

Ministri italian shtoi se Rubio do të takohet me udhëheqjen politike të Danimarkës me qëllim diskutimin e kësaj çështjeje. Ai ritheksoi deklaratën e përbashkët të vendeve evropiane se fati i Groenlandës vendoset nga vetë ajo dhe Danimarka.

“Si Itali, së bashku me vendet e tjera evropiane, ne kujtuam se fati i Groenlandës vendoset nga Groenlanda dhe Danimarka. Arktiku është me rëndësi themelore për sigurinë e të gjithëve ne në Perëndim.

 Megjithatë, pavarësia, integriteti territorial dhe paprekshmëria e kufijve të Groenlandës mbeten të pandryshuara”, përfundoi ai.