Moti i keq pushton Sardenjën, përmbytje masive në ishull, të paktën 3 viktima

Të paktën 3 persona kanë humbur jetën nga përmbytjet pasi shira të dendura ranë në pjesën lindore të ishullit të Sardenjës, në Itali, bënë të ditur autoritetet italiane.

Në Biti, një qytet i vogël në provincën e Nuoros, rrugët u mbushën nga lumenj balte që mbuluan automjete dhe katet përdhese të shtëpive.

Sipas autoriteteve lokale, situata në Biti ka qenë jashtëzakonisht dramatike, ku disa persona kanë vdekur dhe të tjerë konsiderohen të humbur.

Kështu, një fermer 55-vjeçar mbeti i vrarë nga një rrëshqitje toke, ndërsa një i moshuar 90 vjeç humbi jetën në banesën e tij.

Ndërkohë, ekipet e shpëtimit po kërkojnë trupin e një gruaje.

Autoritetet shtuan se niveli i alarmit për shkak të motit të keq është i kuq, pasi shirat mund të intensifikohen në orët e ardhshme dhe të përfshijnë të gjithë ishullin.