Navalny kthehet në burg, kreu i opozitës ruse apel qytetarëve: Dilni në protesta

Një gjykatë në Rusi ktheu në qeli për të paktën 30 ditë kritikun e Kremlinit, Alexei Navalny, nën akuzën e shkeljes së kushteve të një dënimi me burg të pezulluar.

Vendimi, që vjen një ditë pasi eksponenti kryesor i opozitës ruse u kthye në Rusi nga Gjermania, ku u mjekua pas helmimit me agjent nervor, ka gjasa të jetë një prelud i një dënimi të gjatë.

Ndërkohë, shërbimi i burgjeve në Moskë aplikoi për konvertimin në kohë burgu të dënimit të pezulluar në dëm të Navalny-t, për akuzën e pvërvetësimit.

Vetë kritiku i Kremlinit, i cili përballet edhe me tre çështje të tjera penale, u bëri thirrje qytetarëve rusë që të dalin në protestë. Thirrjen e tij ai e bëri në një video të xhiruar pas vendimit të gjykatës.

“Mos kini frikë, mbushni rrugët. Mos dilni për mua, dilni për veten tuaj dhe të ardhmen tuaj”, kjo është thirrja e kritikut të Kremlinit.

Ndërkohë, vende të ndryshme perëndimore dhe Kombet e Bashkuara i bënë thirrje autoriteteve në Moskë që ta lirojnë menjëherë atë.

“Rusia është një vend që ka Kushtetutën dhe detyrimet e saj ndërkombëtare ndaj parimit të sundimit të ligjit dhe mbrojtjes së të drejtave civile. Këto parime, natyrisht, duhet të aplikohen edhe në rastin e zotit Navalny”,  u shpreh Heiko Maas, ministër i Jashtëm i Gjermanisë. 

Nga ana e saj, Moska është përgjigjur duke i kërkuar Perëndimit të mos përfshihet në çështjet e saj të brendshme.

Lexoni gjithashtu:

Tridhjetë ditë arrest me burg për Alexei Navalny

Alexei Navalny ndalohet nga autoritetet ruse pak pas mbërritjes në Moskë