Ndërron jetë bateristi Joey Jordison, themeluesi i bandës amerikane të rrokut Slipknot

Joey Jordison, një ndër themeluesit e parë të bandës së famshme të rrokut Slipknot, ka ndërruar jetë në moshën 46-vjeçare ditën e mërkurë, njoftuan familjarët e tij.

“Me zemër të thyer ndajmë më ju lajmin se Joey Jordison, një baterist, muzikant dhe artist i dashur për të gjiithë, ka ndërruar jetë ditën e sotme në gjumë. Vdekja e tij na ka lënë të gjithëve me zemrën bosh”, shkruhej në njoftimin e familjes së tij, megjithatë asnjë detaj nuk u shpërnda në lidhje me shkakun apo vendin e vdekjes.

Jordison u rrit në Des Moines në Ajoua, SHBA dhe filloi t’i binte baterisë që në moshën tetë vjeçare. Ai tashmë ishte një veteran në skenën e muzikës metal, i cili mori famë që prej themelimit të bandës së famshme Slipknot në vitin 1995 së bashku me muzikantët Shawn Crahan dhe Paul Gray.

Të tre nisën të planifikonin ngritjen e bandës së tyre në karburantin ku Jordison punonte atë kohë.

Grupi i tyre u bë i njohur nga shfaqjet e veçanta, ku të gjithë muzikantët visheshin me kostume dhe maska ndërsa këndonin tingujt e këngëve metal.

Në performancat e tij, Jordison zakonisht mbante një maskë të bardhë të pikturuar me bojë të zezë dhe një kurorë me gjemba në kokë.

Slipknot u bë një ndër bandat më të famshme të muzikës metal në fund të viteve 1990-2000, ndërsa epoka e rrokut sa vinte dhe humbte shkëlqimin.

Në vitin 2013, Jordison iku nga grupi. Ai e justifikoi këtë duke thënë se kishte një sëmundje neurologjike që nuk e lejonte të vazhdonte të bënte muzikë.

Familja e tij tha se bateristi i famshëm do të largohet me një ceremoni private mortore.

Lexoni gjithashtu:

• Mbyllet “Mik Festival”, mblodhi në Prespë artistë shqiptarë dhe të huaj
• Juria e Kanës kurorëzon filmin nga Izraeli rreth palestinezes që gjuajti me shuplakë ushtarin izraelit
• Veprat e piktores Frida Kahlo shfaqen për publikun në Meksikë