Në Lisbonë rikthehen masat, në Moskë restorantet pranojnë vetëm klientë të vaksinuar

Restorantet dhe kafenetë në Lisbonë lejohen të qëndrojnë hapur deri më 15:30 të pasdites në fundjavë, pasi masat lehtësuese në kryeqytetin portugez po rikthehen.

Dy muaj pasi vendi nisi lehtësimin e bllokadës së gjatë, rajoni i Lisbonës po përballet me kufizime të forta për shkak të variantit “Delta” të Coronavirusit, që tani përbën 7 raste nga 10 në kryeqytet.

Ndërkohë, radhë të gjata njerëzish që duan të marrin vaksinën kundër COVID u mblodhën në qendrat e vaksinimit në Moskë, ku po verifikohet një rikthim i rasteve.

Kryebashkiaku, Sergey Sobyanin raportoi se në 24 orët e fundit një shifër rekord prej 60 mijë personash ishin regjistruar për marrjen e dozës.

Nga e hëna, të gjitha restorantet në Moskë do pranojnë vetëm klientë të vaksinuar, të shëruar në 6 muajt e fundit, ose që mund të ofrojnë testin negativ PCR, të bërë në 72 orët e fundit.

Ndërkohë, Spanja shfuqizoi urdhrin për të veshur maskë në ambientet e jashtme, 401 ditë nga momenti kur masa hyri në fuqi për të frenuar pandeminë.

Por në qendër të Madridit, ditën kur kjo masë u hoq, shumë njerëz vazhdonin ta mbanin fytyrën të mbuluar.

LEXONI GJITHASHTU:

Rreziku nga varianti ‘Delta’, më shumë liri për britanikët, Portugalia e frikësuar nga virusi i shfaqur në Indi

Pasojat e pandemisë, BQE: Burrat humbën më shumë vende pune se gratë