Nëntë skiatorë të zhdukur pas ortekut në Kaliforni, ekipet e shpëtimit në kërkim

Nëntë skiatorë në natyrë rezultojnë të zhdukur pas një orteku të fuqishëm që goditi rajonin e Liqeni Tahoe të martën, njoftuan autoritetet lokale.

Sipas Nevada County Sheriff’s Office, gjashtë persona janë shpëtuar pasi mbetën të bllokuar nën dëborë. Dy prej tyre janë transportuar në spital për trajtim mjekësor.

Orteku u raportua rreth orës 11:30 PST në zonën Castle Peak, pranë qytetit Truckee. Autoritetet paralajmëruan se kushtet e motit mbeten të rrezikshme, me një rrezik të lartë për orteqe të tjera në zonë.

Sherifi bëri të ditur se “ekipe shpëtimi me skiatorë shumë të trajnuar” janë angazhuar nga dy vendpushimet aty pranë për të ndihmuar në operacion. Të mbijetuarit janë udhëzuar të strehohen në vend sa më mirë që të jetë e mundur deri në përmirësimin e kushteve.

Fillimisht u raportua se në zonë ndodheshin 16 persona – katër udhërrëfyes dhe 12 klientë – por më vonë autoritetet saktësuan se numri total ishte 15.

Në operacionin e kërkim-shpëtimit janë përfshirë gjithsej 46 ndihmës të emergjencës. Ekspertë nga Boreal Mountain Resort dhe Alder Creek Adventure Center po punojnë gjithashtu për të arritur në vendngjarje dhe për të ndihmuar në gjetjen e personave të zhdukur.