Netanyahu pas njoftimit të Trump për marrëveshjen me Iranin: Izraeli nuk është palë në këtë memorandum

Me një deklaratë me tone ironike, Izraeli komentoi njoftimet e presidentit amerikan Donald Trump për një marrëveshje mes SHBA-së dhe Iranit që do të ketë të bëjë me programin bërthamor dhe me Ngushtica e Hormuzit.

Më herët gjatë pasdites të së enjtes, kryeministri izraelit Benjamin Netanyahu zhvilloi një bisedë telefonike me Trumpin për të diskutuar zhvillimet. Ai foli për një “memorandum mirëkuptimi në formim e sipër me Iranin për nisjen e negociatave”, duke minimizuar me një koment ironik atë që kishte njoftuar presidenti amerikan.

Ai theksoi gjithashtu se Izraeli nuk është palë në këtë memorandum.

Në deklaratën e publikuar më pas thuhet se: “Presidenti Trump bisedoi këtë mbrëmje me kryeministrin Netanyahu në lidhje me memorandumin e mirëkuptimit që po formësohet me Iranin për nisjen e negociatave. Edhe pse Izraeli nuk është palë kontraktuese në këtë memorandum mirëkuptimi, kryeministri shprehu vlerësimin e tij për angazhimin e Presidentit Trump që marrëveshja përfundimtare, pas përfundimit të negociatave, të përfshijë heqjen e uraniumit të pasuruar, çmontimin e infrastrukturës së pasurimit, kufizimin e prodhimit të raketave dhe ndërprerjen e mbështetjes së Iranit për përfaqësuesit e tij terroristë në rajon.”