Netanyahu urdhëron sulm total kundër Hezbollahut, goditen 80 objektiva pas vrasjes së 4 ushtarëve izraelitë

Kryeministri izraelit Benjamin Netanyahu tha se kishte urdhëruar sulme të gjera kundër objektivave të Hezbollahut, pasi katër ushtarë izraelitë u vranë dhe të tjerë u plagosën në sulmet e grupit gjatë natës.

Në një deklaratë në hebraisht, Netanyahu e quajti sulmin e Hezbollahut një “shkelje flagrante të armëpushimit” dhe tha:

“Pas sulmit kriminal të Hezbollahut, unë urdhërova Forcat e Armatosura Izraelite ta godisnin organizatën me forcë”, tha ai.

Sipas tij, forcat izraelite goditën më shumë se 80 objektiva të Hezbollahut gjatë natës dhe vranë dhjetëra luftëtarë, ndërsa sulme të reja në qendrat e komandës së organizatës në Luginën Bekaa pasuan të premten në mëngjes.

Kryeministri izraelit përsëriti se: “Izraeli nuk do të tolerojë sulme kundër ushtarëve ose territorit të tij dhe do t’i imponojë një çmim shumë të lartë Hezbollahut”.

Në të njëjtën kohë, ai përsëriti qëndrimin që kishte shprehur një ditë më parë, se Izraeli do të ruajë praninë e tij në zonën e sigurisë të Libanit jugor: “Izraeli do të mbetet në zonën e sigurisë në Libanin jugor për aq kohë sa të jetë e nevojshme për të mbrojtur komunitetet në veri.”

Netanyahu shprehu gjithashtu ngushëllimet e tij për familjet e ushtarëve të vrarë dhe u uroi shërim të shpejtë të plagosurve.

Komentet e tij vijnë në një kohë fërkimesh në rritje me Uashingtonin, pasi Presidenti i SHBA-së Donald Trump dhe Zëvendëspresidenti J.D. Vance kanë qenë jashtëzakonisht të zëshëm në kritikat e tyre ndaj operacioneve ushtarake izraelite kundër Hezbollahut, ndërsa Teherani vazhdon të këmbëngulë se tërheqja e plotë e Izraelit nga Libani është një kusht kyç për zbatimin e marrëveshjes së tij me Shtetet e Bashkuara.