New Jersey bëhet shteti i 12-të në SHBA që legalizon mariuanën

New Jersey u bë sot gjatë zgjedhjeve presidenciale shteti i dymbëdhjetë në Shtetet e Bashkuara të Amerikës që legalizon përdorimin “rekreativ” të mariuanës për moshat mbi 21 vjeç.

Qytetarët e shtetit prej rreth 9 milionë banorëve votuan me 67% “pro” legalizimit në referendumin e thirrur krahas zgjedhjeve për president duke u bërë shteti i 12-të në SHBA që ligjëron kanabisin.

Përveç Njew Jersey-it gjatë ditës së sotme për legalizimin e përdorimit të mariuanës pritet të vendosin edhe tre shtete të tjera, Arizona, Montana dhe Dakota e Jugut.

Aktualisht përdorimi për qëllime mjekësore lejohet në 33 shtete, por ligjërimi i përdorimit rekreativ ka pasur kundërshti për efektet e varësisë që mund të ketë te konsumatorët.

Ligjërimi i mariuanës në New Jersey vë në trysni shtetet fqinje si New York apo Pennsylvania.

Vitin e fundit në New Jersey ka pasur një numër të shtuar arrestimesh për përdorim kanabisi.

Tashmë pas këtij votimi do të nisë procesi burokratik i nxjerrjes së normave dhe rregullave që do ta lejojnë përdorimin dhe licencimin e tregtimit të kanabisit, ndërsa ekspertët e ekonomisë parashikojnë qindra milionë dollarë të ardhura nga taksat.